Askirege

Askirege

Dada Askirego mal sewiti
Silêmanê mi zerrê dêri
Ax biko ezo se keri se nêkeri
Ê to siya cêncine, mide kar kerdo khaline
Çi wele be cencia to be khalina xoro keri
Vano Bao duzumunê mi, bide giredi
Bêsliyê mi bide hermê xode keri
Vano “biko, mao Loluna tima dênê pêro
Ma nêdiyêne qol vêreno ra yêno sono
Kono barimaðê na kemêri
Ê to iso bin nêbi
Xafila Heqo talay biyê,
Amê reste ondêre çebêri”
Vano “defê verê xo mi çarne
Biko çhêrina toro sêrkiri
Çhêrina Silêman Agaê xoa ke mi diye
Seke sewqê asme binê Thelpê hêwri ra vecino
Pençere ra erzeno zerre
Têpia kona ra binê hêwri”

Lao elçiye birusne Mezra Koyi
Çê Saycanê Raybêri
Saycan Aga vano
Dirbetia Silêman Agay melem nêcêna
Ezo waryatê çê Temirê Milêy teber keri
Dirbêtia Silêman Agay ilac u melem keri
Nê vano bao çêvêsaye mi ke torê va
To çira gos ro minêna wiy
Mi va zimistono piro biya malê na danga
Asira Loli asire de hersiza
Ebe di bêli mala nêbena perisan, wiy
Nê hata Mezra çê Meserê Sadiqi hudut danê ma
Tenê verê xo kenê hira, wiy
Tecelê say ra kote semê ma, bêwayira manga
Manga sawi biyê, qorrê vengê xo si uli diwa
Mi va bao na manga raverde sêro
To va biko manga dêsmênia nêverdana ra
Bao manga qorrê vêngê xo siyo uli diwa
To nêzana ke derdê cigere senêno
Cigera to ki nia adir niseno pa

Silo Qiz

Bawa Sêyd Rizay

Babaê Sêyd Rızay
Vaji vaji, cêncenia to Babay sero vaji
Vaji vaji, cêncenia Babay sero vaji
Bavaê mı ospor biyo, şiyo Xozato vêsaye
Bıko dirê sêrri cêno, pasayen u begleriya Kırmanci

Cınaza vıstêwri u zamay naê tê dıma
Kertê Borızo ser de anê
Şıx Hesenê mırê vazê
‘Laê mı uwa ke tı vana êndi a niya
Bê mezela Bavay sero
Tarıq u numrê kistene laê mı yazmişke’
Cırê xo dêşt komete vıraji
Bao meberve, dina Hêq de
Merexê Şıxeseno u Dêrsimi Bavaê to bi
Êndi her kes beno sa, merdena mırê biyê raji

Bavaê mırê merex nêbo
Mı laê xo sero roz u cemê Şine de qewğa gurete
Şina vêsaiya de kerde melule, ax bıko çıla fener u qaji
Dina alem ke mırê vazo derdê mı gırano
Bavaê xo sero ez danupêro
Ê mın u mêrdê qırğıji hata az ve aji
Aşırê Alla içun vazê
Çıla mumıne bıcêri wertê aşıranê Şixhesenu ve Aşiranê Dêrsim ra şêri
Kotê dina de bıvên taisê na laci


Hala bêre mınu ğezevê Bavaê mı na hêkmete
Hala bêre sêrkêre ğezevê Hêq na hêkmete
Êwro pusula arda tıra niyadanê
Vake cına za vıstêwri u zamay naê têdıma diyarê Borızu ser de vete
Ax Baba’m dinalıga sêwtmale de yê kistene niyo
Bıko tesela piyê to yê kokımi kote
Şixhesenê mırê vazê, “Laê’m êndi awa ke tı vana a niya
Bê mezela Bavay sero oronce hêws u komete
Bao merex meke na qesa qevul nêkero, na dina de Mehemedê homete
Bavaê xo sero vaze ke ez pêrodi, bıko wad bo ke dina de
Na derd u efkar mıde nêro axrete
Mı va hêfê Sultan Sılêmanê mı, serd biyayêna cêno
Niştêro phoşta mı çar tenê Dêrsımo, ax xayına na dewlete

Usar nao amo, şili vorenê, Bavaê mı laşêr derey kerdê şêni
Laşêr gınêde Sultan Sılêmanê mı, derey kerdê şêni
Alla içun qesey bıkêre, koti emsalê Bavaê xo u çhêren ez bıvêni
“Bao merex meke, dina sêwtmale de mo xovir ra bıke
Tım lazê camerdo mırenê,
Mıra tepia bıwaze weşia bıraê mı Şıxhesêni

Şina mêrase cigerê mı govano
Şine mêres bımano, Sultan Sılêmanê mı gavano
Van nêvan Bavaê mı çhêria xode ro, gos ra mı nênano
Mı va “Laê mıgos ra mıne sona koti
Lınga xo ro çê mêrdê Qırğıci mefiye,
Mêrdo Qırgız dısmeno khano, hêfê xo kêş rê nêverdano
Serra ke Memed Ağaê lacê Sılêman Ağay
Destê Babaê mıra biyo dırvetın, atsê xo dırvetonê xora ontê
Dısmale de gırêdê, cayê xo sero qonağ de fiştê darde
Son be son naleno, cêro dırvetonê xode niyadano
Bavaê mı ez naleno, hata roza merdene to sero danpêro
Belka peyniye de cinika viyaê warê mıde nêmano
Se u zu laz ke bêro, Bavaê mı sultan Sılêmano.”

Vatoğ:Sılêmono Qıc

Hewa Derê Laci

Hewa Derê Laçi


halo, halo, halê ma yamano!
esker onto ma ser de, dormê ma qapano
ordi zafo, canê wela ma nêdano
şêrê diyarê Laçi sere, têde mız u dumano
şêrê diyarê Laçi sere, têde şin u şivano
bextê aşiru bırıjiyo, kes ma rê alaqutare nêvano
Qemerê Heseni verê mığare de gıno waro, şêrê mınê berano
İvişi xo sanıto Pulê Pil Xatune
ham dano pêro, hem qeydu vano
vano »to hirê ordi ontê ma ser de«
Haqi ke dest da, nafa neferi ra nêverdano
zalımi qısley untê ma ser de,
Haqi ke dest da, nafa onderi ra neferi ra nêverdano
aşiru nıka teseliya xo ma Demenu ra gurete
meşte ki goçê sıma jê goçê Hermeniyano

eskeri zor kerdo, İvisê mı, xo bıçarne peyê kemere!
ewro hucım kerdo, qolê hetê Pêtere
qersuna ondere gınay İvis ağaê mı, esker heni kuto dere
ax yamano, malê tharva cigere
kamo ma u piyê to rê biaro, bıko, a xevere

qırkerdena ma Demenu, aşiru rê ruswete, pere
Dina Haqi persenê, dina de zurekera bêtivara

derê Laçi bıvêso! İvisê mı çeto
şêrê diyarê Laçi ser, asmêni ra, ax, roz vıneto
merdena koy persenê, ma rê çêf u saltaneto
kam ke ma ra Derê Laçi de mıreno
roza İmam Uşêni axrete de caê xo ceneto
ma do pêro, hêfê xuyo hawt bedeli gureto
qır keme, qır nêkeme, nêqedino, ordiyê dewleto

Derê Laçi bıvêso! İvisê mı, şiya aşire
lazê mı dest u boji semerrnê we, kuto wertê tavure
lerze meke, ravê meso, rew memıre!
ax lemın, bao, ravê meso, rew memıro!
ordiyê hokmati zafo, dina ma ser de kerde sajia sure
onderê Haqê mı, kıstena İvis ağaê mı bena zure



Vatoğ/Çıme: Sılêmano Qız

Melem tiya

melem tıya tıya, roê canê mın tıya
ticia sodıria, heqo, homa, wiy, veciya
gerdanê vıliya, heqo, beşlüyê na hermiya

ez diyar ra veciyan, kewra, sêmıge sero roniştiya
şiyan verê çêberi, rınde çê de niya
der o cirani ra mı pers kerd, mı vat, kata şiya
va ke, mıleto şiyo jiare, a tey şiya
cêniy bover ra amay, heqo, rında mı tey niya
ezo bêkes xo rê teyna dıme şiyan
gınan be waro, dıdanê mıno jü lewiya, heqo
teko zu sıkiya

mı destê rında xo gırot
şiyan lewê qadi o muftiyan
va ke, cüamêrdo ke cêniyan dıma fetelino
gonia xo çiniya

melem tıya tıya, roê canê mın tıya
gerdanê wiy vıliya, heqo, beşlüyê na hermiya
ticia sodıria, heqo, homa, wiy, veciya
xwazi be herdê dewrêşi bo, sero feteliya
qırbanê asmênê khewi bi, tı xo bın de diya
sıma rê ke kotiya, mı rê wiy nazliya

naymê ma vilato, doymê ma vilato
basqanê ni Xozati nıka demırqırato
mabênê mın o rında mın de, kewra kewra, diwaro, wiy, çar qato
jüyê ke to de sere sano berjine, heqo
rocê des o dı imanan de caê xo be xo vato

ezo ewro şiyan serê na locıne
kopegê mêrdi cêniya xo de qesey keno, heqo
torê goyıl o gorgeçine
zerre zerrê mın de nêmend
kerd bınê eleg o pırocıne

melem vaê êno, mı va, vaê veri
çêanê ma bar kerdo, waranê ser kemeri
sano xêr ke beno, her kes mıradê rındanê xo dero
dumane mın bıcêro, ezo bêkes se keri

kênê, tıya tıya, wiy roê mın tıya
direga, wiy, zerriya, beşlüyê wiy hermiya
ticia sodıria, homa wiy veciya

vore na varena, kewra, hurdi herdi
kewranê Zeynel Begi amo verê pırdi
demê xo nata de, lewê keri mırdi

verê çeberi pêto, be dalık o buki
dewa ma ro biyê têra, heqo, werdeg o fatfatıki
cêniya rınde ke kuna cüamêrdê koti dest
se ke malê bena, mırdar erzenê kutıki

cani cani cani, melema mın cani
kênê, tı nata bê, ezo lewê pani
lewê ma biyo qırım o qotık, heqo, kuto der o cirani
rınde mı rê va ke, heqi zanena, fınde cema sani

ezo be qurban bi, to lew o pırnıkan
ezo be qurban bi heqo, to lew o pırnıkan
kênê, to ra êna, boa qerefil o dermanê sukan
demê xo nata de, lewê to ra ni
seba canê to nefstenıkan


qese: (khan)
vatoğ u qeyde: Zeynelê Qeremani
het: Xozat