Askirege

Dada Askirego mal sewiti
Sılêmanê mı zerrê dêri
Ax bıko ezo se keri se nêkeri
Ê to şiya cêncine, mıde kar kerdo khaline
Çı wele be cencia to be khalina xoro keri
Vano Bao duzumunê mı, bıde gıredi
Bêşliyê mı bıde hermê xode keri
Vano “bıko, mao Loluna tıma dênê pêro
Ma nêdiyêne qol vêreno ra yêno sono
Kono barımağê na kemêri
Ê to iso bin nêbi
Xafıla Heqo talay biyê,
Amê reste ondêre çebêri”
Vano “defê verê xo mı çarne
Bıko çhêrina toro sêrkiri
Çhêrina Sılêman Ağaê xoa ke mı diye
Seke şewqê asme bınê Thelpê hêwri ra vecino
Pençere ra erzeno zerre
Têpia kona ra bınê hêwri”

Lao elçiye bırusne Mezra Koyi
Çê Saycanê Raybêri
Saycan Ağa vano
Dırbetia Sılêman Ağay melem nêcêna
Ezo waryatê çê Temırê Mılêy teber keri
Dırbêtia Sılêman Ağay ilac u melem keri
Nê vano bao çêvêsaye mı ke torê va
To çıra gos ro mınêna wiy
Mı va zımıstono pıro biya malê na danga
Aşira Loli aşire de hersıza
Ebe dı bêli mala nêbena perisan, wiy
Nê hata Mezra çê Meserê Sadıqi hudut danê ma
Tenê verê xo kenê hira, wiy
Tecelê şay ra kote semê ma, bêwayıra manga
Manga sawi biyê, qorrê vengê xo şi uli diwa
Mı va bao na manga raverde sêro
To va bıko manga dêsmênia nêverdana ra
Bao manga qorrê vêngê xo şiyo uli diwa
To nêzana ke derdê cigere senêno
Cigera to ki nia adır niseno pa


Sılo Qız